محکمہ صحت پنجاب نے من پسند نجی کمپنی سے بڑی تعداد میں ائیر کنڈیشنرز خرید لیے
پنجاب کے محکمہ صحت نے عوامی فنڈز سے بڑی تعداد میں ائیر کنڈیشنرز خریدنے کا ایک ایسا معاہدہ کیا ہے جس پر شفافیت کے سنگین سوالات اٹھنے لگے ہیں۔ ذرائع کے مطابق، یہ مہنگے داموں خریداری ایک مخصوص نجی کمپنی کو نوازنے کے لیے کی گئی، جس سے سابقہ معاہدے بھی زیرِ سوال رہے ہیں۔
ذرائع کا کہنا ہے کہ بغیر کھلے ٹینڈر یا شفاف بڈنگ کے، اچانک لاکھوں روپے مالیت کے درجنوں اے سی اس کمپنی سے منگوائے گئے، حالانکہ مارکیٹ میں کم قیمت پر معیاری متبادل موجود تھے۔ افسوسناک امر یہ ہے کہ یہ اخراجات ایسے وقت میں کیے جا رہے ہیں جب پنجاب کے کئی سرکاری اسپتالوں میں بنیادی سہولیات اور ادویات کی قلت کی خبریں عام ہو چکی ہیں۔
محکمہ صحت کے اندرونی حلقے اس خریداری کو “پسِ پردہ مفادات کا کھیل” قرار دے رہے ہیں، جب کہ ماہرین اسے سرکاری وسائل کے غیر منصفانہ استعمال کی واضح مثال سمجھتے ہیں۔
ادھر عوامی و سماجی حلقوں نے اس معاملے پر شدید تحفظات کا اظہار کرتے ہوئے مطالبہ کیا ہے کہ حکومت فوری طور پر اس معاہدے کی شفاف انکوائری کروائے اور ملوث افسران کے خلاف کارروائی کی جائے۔
اس سارے معاملے پر تاحال محکمہ صحت کی جانب سے کوئی باضابطہ مؤقف سامنے نہیں آیا، جس سے شکوک مزید گہرے ہوتے جا رہے ہیں۔
