خیبرپختونخوا کے سیلاب زدہ علاقوں میں مزید بارشوں کی ایڈوائزری جاری
محکمہ موسمیات نے خیبرپختونخوا کے سیلاب سے متاثرہ اضلاع کے لیے ایک اور موسمی ایڈوائزری جاری کر دی ہے، جس میں اگلے چند روز کے دوران مزید تیز بارشوں اور ممکنہ ندی نالوں میں طغیانی کا خدشہ ظاہر کیا گیا ہے۔
ایڈوائزری کے مطابق، چترال، سوات، دیر، مانسہرہ، کوہستان، مالاکنڈ اور شانگلہ کے اضلاع میں گرج چمک کے ساتھ موسلا دھار بارشوں کا سلسلہ دوبارہ شروع ہو سکتا ہے، جس سے پہلے ہی متاثرہ علاقوں میں صورتِ حال مزید سنگین ہو سکتی ہے۔
محکمہ موسمیات نے مقامی انتظامیہ اور امدادی اداروں کو الرٹ رہنے کی ہدایت کرتے ہوئے کہا ہے کہ لینڈ سلائیڈنگ، سڑکوں کی بندش، اور رابطہ پلوں کے متاثر ہونے کا بھی خطرہ ہے۔ شہریوں کو غیر ضروری سفر سے گریز اور محفوظ مقامات پر منتقل ہونے کی ہدایت کی گئی ہے۔
صوبائی ڈیزاسٹر مینجمنٹ اتھارٹی (PDMA) نے بھی ہنگامی پلان فعال کر دیا ہے اور مقامی حکام کو امدادی سامان اور مشینری الرٹ رکھنے کی ہدایت جاری کر دی گئی ہے۔
ماہرین کے مطابق، زمین پہلے ہی پانی سے سیر ہو چکی ہے، اس لیے معمولی بارش بھی شدید اثرات مرتب کر سکتی ہے۔
