چاول کی پیداوار میں بڑا انقلابی اقدام، ہائبرڈ بیچ تیار

پاکستانی زرعی ماہرین نے چاول کی پیداوار میں ایک بڑی کامیابی حاصل کرتے ہوئے ہائبرڈ بیج کی نئی قسم تیار کر لی ہے، جو نہ صرف کم وقت میں تیار ہوتی ہے بلکہ روایتی اقسام کے مقابلے میں دوگنا پیداوار دینے کی صلاحیت رکھتی ہے۔

یہ ہائبرڈ بیج پاکستانی ماہرین زراعت نے کئی سالہ تحقیق کے بعد تیار کیا، جس کا مقصد چاول کی بڑھتی ہوئی ملکی و عالمی طلب کو پورا کرنا ہے۔ ابتدائی تجربات کے مطابق اس بیج کی بدولت کسان کم پانی، کم کھاد اور کم وقت میں زیادہ پیداوار حاصل کر سکتے ہیں۔

ڈاکٹر فیصل ندیم، جو اس منصوبے کے مرکزی محقق ہیں، کا کہنا ہے

ہم نے ایک ایسا بیج تیار کیا ہے جو شدید گرمی اور بیماریوں کے خلاف قدرتی مزاحمت رکھتا ہے۔ یہ کسانوں کے لیے ایک گیم چینجر ثابت ہو سکتا ہے۔

حکام کا کہنا ہے کہ اس ہائبرڈ بیج کا تجربہ مختلف علاقوں میں کیا جا چکا ہے، جہاں اس کی فی ایکڑ پیداوار 80 سے 100 من تک دیکھی گئی ہے، جو کہ عام اقسام کے مقابلے میں نمایاں طور پر زیادہ ہے۔

ماہرین کے مطابق اس جدید بیج سے چاول کی برآمدات میں بھی اضافہ ممکن ہے، جو پاکستان کے زرِ مبادلہ کے ذخائر کو بہتر بنانے میں اہم کردار ادا کر سکتا ہے۔