کاروبار میں آسانی اور سرمایہ کاری کے نئے امکانات; 104 اصلاحات منظور
اسلام آباد: حکومت نے ملک میں کاروبار میں آسانی کو فروغ دینے اور غیر ملکی سرمایہ کاری کو متوجہ کرنے کے لیے 104 نئی اصلاحات کی منظوری دے دی ہے۔ ان اصلاحات کا مقصد کاروباری ماحول کو سہل، شفاف اور مؤثر بنانا ہے تاکہ مقامی و بین الاقوامی سرمایہ کار اعتماد کے ساتھ پاکستان میں سرمایہ کاری کر سکیں۔
ان اصلاحات میں رجسٹریشن کے عمل میں آسانی، ٹیکس نظام میں بہتری، لائسنسنگ میں خودکاری، برآمدی و درآمدی عمل کی ڈیجیٹلائزیشن اور سرکاری اداروں کے درمیان بہتر ربط کو ترجیح دی گئی ہے۔
وزارت خزانہ کے مطابق، یہ اصلاحات “ایز آف ڈوئنگ بزنس” انڈیکس میں پاکستان کی درجہ بندی کو بہتر بنانے میں مدد دیں گی، جس سے عالمی سرمایہ کاروں کا اعتماد بحال ہوگا۔
سرکاری ذرائع کے مطابق، ان اقدامات سے نہ صرف بیرونی سرمایہ کاری بڑھے گی بلکہ مقامی کاروباروں کو بھی ترقی کے نئے مواقع حاصل ہوں گے۔ خاص طور پر چھوٹے اور درمیانے درجے کے کاروباروںریگولیٹری بوجھ سے نجات دی جائے گی، تاکہ وہ بہتر انداز میں ملکی معیشت میں کردار ادا کر سکیں۔
ماہرین معاشیات نے ان اصلاحات کو کاروبار میں آسانی کے فروغ کی جانب ایک اہم قدم قرار دیا ہے، تاہم ان کا کہنا ہے کہ ان اصلاحات کا عملی نفاذ اور نگرانی بھی نہایت ضروری ہے تاکہ مطلوبہ نتائج حاصل کیے جا سکیں۔
اصلاحات کا نفاذ وفاقی اور صوبائی سطح پر مشترکہ طور پر کیا جائے گا، اور حکومت کی جانب سے ایک مانیٹرنگ سیل بھی قائم کیا جا رہا ہے جو ان اقدامات کی پیشرفت کی نگرانی کرے گا۔