عالمی و مقامی مارکیٹوں میں دو روزہ کمی کے بعد سونا پھر مہنگا

دو روزہ مسلسل کمی کے بعد سونے کی قیمت ایک بار پھر بڑھنے لگی ہے، جس سے نہ صرف زیورات کی خریداری کرنے والوں کو مایوسی کا سامنا ہے بلکہ سرمایہ کاروں میں بھی نئی بے چینی پیدا ہو گئی ہے۔

آل پاکستان جیمز اینڈ جیولرز ایسوسی ایشن کے مطابق، ملک بھر میں فی تولہ سونے کی قیمت 1,500 روپے کے اضافے کے بعد 2 لاکھ 42 ہزار روپے تک پہنچ گئی ہے، جبکہ 10 گرام سونا 1,286 روپے اضافے سے 2 لاکھ 7 ہزار 476 روپے میں فروخت ہو رہا ہے۔

عالمی مارکیٹ میں بھی سونے کی قیمت میں اضافہ ریکارڈ کیا گیا ہے، جہاں فی اونس سونا 17 ڈالر بڑھ کر 2,442 ڈالر پر پہنچ گیا ہے۔ معاشی ماہرین کے مطابق، عالمی مارکیٹ میں جاری مالیاتی غیر یقینی صورتحال، ڈالر کی قدر میں اتار چڑھاؤ اور شرحِ سود میں تبدیلیوں کے باعث سونے کی قیمت ایک بار پھر اوپر کی جانب گئی ہے۔

ماہرین کا کہنا ہے کہ اگر یہی رجحان برقرار رہا تو آئندہ دنوں میں سونے کی قیمت مزید بڑھ سکتی ہے، جس کا براہِ راست اثر شادیوں کی تیاری کرنے والے متوسط طبقے پر پڑے گا۔دوسری جانب، جیولرز نے خریداروں میں کمی کی شکایت کرتے ہوئے کہا ہے کہ مہنگائی کے باعث اب لوگ صرف دیکھنے تک محدود ہو گئے ہیں، خریداری کا رجحان مسلسل کم ہوتا جا رہا ہے۔