آج سے ملک بھر میں مون سون ہوائیں داخل ہونگی، شدید بارشوں کی پیشگوئی

محکمہ موسمیات کے مطابق آج سے ملک بھر میں مون سون ہوائیں داخل ہونا شروع ہو گئی ہیں۔ ان ہواؤں کے باعث مختلف علاقوں میں بارشوں کا سلسلہ شروع ہونے کا امکان ہے۔

ترجمان محکمہ موسمیات نے بتایا ہے کہ مون سون ہوائیں بحیرہ عرب اور خلیج بنگال سے پاکستان میں داخل ہو رہی ہیں، جس کے نتیجے میں آئندہ چند روز کے دوران پنجاب، خیبر پختونخوا، بلوچستان، کشمیر، اور گلگت بلتستان میں بارشیں متوقع ہیں۔

کئی شہروں میں موسلا دھار بارش اور آندھی کا بھی خدشہ ظاہر کیا گیا ہے۔ بعض علاقوں میں نشیبی مقامات پر پانی جمع ہونے اور لینڈ سلائیڈنگ کے خطرات بھی موجود ہیں۔

محکمہ موسمیات نے شہریوں کو احتیاط برتنے کی ہدایت کی ہے جبکہ متعلقہ اداروں کو ممکنہ ہنگامی صورتحال سے نمٹنے کے لیے الرٹ رہنے کو کہا گیا ہے۔