گرل فرینڈ سے جدائی کا صدمہ، چینی نوجوان پہاڑوں میں جا بسا

چینی صوبے سیچوان سے تعلق رکھنے والے 26 سالہ لی وے نے اپنی گرل فرینڈ سے بچھڑنے کے بعد شہروں کی چکاچوند زندگی کو خیر باد کہا اور تنہائی کے سکون کی تلاش میں پہاڑوں کی خاموش وادیوں کا رخ کر لیا۔ اطلاعات کے مطابق، لی وے پچھلے سات ماہ سے ایک جنگل نما پہاڑی علاقے میں قیام پذیر ہے، جہاں وہ خود اگائی سبزیوں اور چشمے کے پانی پر گزارہ کرتا ہے۔لی وے نے سوشل میڈیا پر اپنے چند وڈیوز اپ لوڈ کی ہیں جن میں وہ لکڑی کا گھر بناتے، آگ جلاتے اور قدرتی مناظر سے لطف اندوز ہوتے دکھائی دیتا ہے۔ ان وڈیوز نے دیکھتے ہی دیکھتے لاکھوں ویوز حاصل کر لیے اور لی وے “پہاڑوں کا عاشق” کے نام سے مشہور ہو گیا۔

مقامی میڈیا سے بات کرتے ہوئے اس نے کہا: “محبت میں دل ٹوٹا، تو لگا جیسے سب کچھ ختم ہو گیا ہو۔ میں نے سوچا کہ اگر دنیا مجھے سمجھ نہیں سکتی، تو شاید قدرت مجھے اپنائے گی۔“

ماہرینِ نفسیات کے مطابق یہ رویہ جذباتی صدمے کا فطری ردعمل ہو سکتا ہے، تاہم مکمل تنہائی بعض اوقات ذہنی صحت کے لیے خطرناک بھی ثابت ہو سکتی ہے۔ دوسری جانب، سوشل میڈیا صارفین لی وے کے اس فیصلے کو “دلیری” اور “روحانی سفر” کا نام دے رہے ہیں۔