فضائی آلودگی سے بچاؤ کیلئے اسمارٹ موٹر سائیکل ہیلمٹ تیار
پاکستانی انجینئرز نے فضائی آلودگی سے تحفظ کے لیے ایک جدید اسمارٹ موٹر سائیکل ہیلمٹ تیار کر لیا ہے۔ اس ہیلمٹ میں ایئر فلٹر، آلودگی ناپنے والے سینسر، اور موبائل ایپ کنیکٹیویٹی جیسی سہولیات شامل کی گئی ہیں۔
ابتدائی معلومات کے مطابق، یہ ہیلمٹ شہری علاقوں میں موٹر سائیکل سواروں کو آلودہ ہوا سے محفوظ رکھنے کے لیے تیار کیا گیا ہے، تاکہ وہ سانس کی بیماریوں سے بچ سکیں۔
اسمارٹ موٹر سائیکل ہیلمٹ میں نصب فلٹر سسٹم دھوئیں، گرد و غبار اور مضر ذرات کو صاف کرنے کی صلاحیت رکھتا ہے، جبکہ سینسر اردگرد کی ہوا کے معیار کو مانیٹر کر کے موبائل ایپ کے ذریعے رپورٹ فراہم کرتا ہے۔
یہ ہیلمٹ ابتدائی طور پر لاہور اور اسلام آباد میں تجرباتی بنیادوں پر متعارف کروایا گیا ہے۔ آزمائشی مرحلے میں شامل موٹر سائیکل سواروں نے اسے مؤثر قرار دیا ہے۔ہیلمٹ تیار کرنے والی کمپنی کے مطابق، اس کی قیمت 12 ہزار روپے رکھی گئی ہے، جبکہ بڑے پیمانے پر پیداوار کی صورت میں قیمت میں کمی کا امکان ہے۔
ذرائع کا کہنا ہے کہ وزارت موسمیاتی تبدیلی نے اس منصوبے میں دلچسپی ظاہر کی ہے اور امکان ہے کہ یہ پروڈکٹ حکومتی سطح پر بھی متعارف کروائی جائے گی۔
