سعودی عرب میں 8 گھنٹے طویل آپریشن کے بعد دھڑ جڑی دو شامی بچیوں کو الگ کردیا گیا

سعودی عرب میں ڈاکٹروں کی ایک ماہر ٹیم نے 8 گھنٹے طویل کامیاب آپریشن کے بعد دھڑ سے جڑی ہوئی دو شامی بچیوں کو علیحدہ کر دیا۔ دونوں بچیاں پیدائش سے ہی جسم کے نچلے حصے سے جڑی ہوئی تھیں۔

یہ آپریشن ریاض کے کنگ عبدالعزیز میڈیکل سٹی میں کیا گیا، جہاں سعودی کنجوائنڈ ٹوئنز پروگرام کے تحت اب تک 130 سے زائد کیسز پر کام کیا جا چکا ہے۔سعودی وزارت صحت کے مطابق، یہ دونوں جڑواں بچیاں شام سے تعلق رکھتی ہیں اور ان کا کیس پیچیدہ مگر قابلِ علاج تھا۔ ڈاکٹروں کی ٹیم میں 35 سے زائد ماہرین، سرجنز، نرسز اور تکنیکی عملہ شامل تھا۔

آپریشن کو چار مراحل میں مکمل کیا گیا، جن میں بچوں کی ہڈیوں، پٹھوں، آنتوں، اور جلد کی علیحدگی شامل تھی۔ دونوں بچیوں کی حالت آپریشن کے بعد مستحکم بتائی گئی ہے اور انہیں انتہائی نگہداشت کے وارڈ میں رکھا گیا ہے۔

سعودی حکام کے مطابق، اس انسانی ہمدردی کے مشن کا مقصد دنیا بھر کے ضرورت مند بچوں کو مفت طبی سہولیات فراہم کرنا ہے، خاص طور پر وہ بچے جو مہنگے علاج کے متحمل نہیں ہو سکتے۔

شامی والدین نے سعودی حکومت اور میڈیکل ٹیم کا شکریہ ادا کرتے ہوئے کہا کہ وہ اپنی بچیوں کو ایک نارمل زندگی کی طرف جاتے دیکھ کر خوشی سے بھر گئے ہیں۔